أهلا بيكم
مستمعينا قارئ راديو " طز " وحلقة جديدة من برنامجكم "المصطبة
" واللي هيكون معانا فيها ضيوفنا
المعتادين " الشيخ مرزوق عبد الرازق المتحدث الرسمي للجماعة إياهم , والإستاذ
"س تكعيب" بتاع الإستراتيجيات واللوجيتسيات والحاجات اللي أخرها دايما
تات , وهيكون معانا ضيف جديدة وهو "محمود فانديتا " أو زي مالجماعة سموه
" بانضيتا " خلينا ننزل لمصطبتنا ونشوف ايه اللي بيتقال عليها , ولما
نزلنا لمطصبتنا ملقناش غير موضوع واحد " الأخوان واللي جابوه الأخوان واللي
عمله الأخوان "
تكعيب : ايه
ياجماعة اللي حصل النهاردة في الميدان ده انا سمعت انه كان في إحتكاكات ايه موضوع
الإحتكاكات دي ياشيخ مرزوق
مرزوق : بسم الله
والصلاة والسلام علي رسول الله , في البداية أخ تكعيب ما حدث هو محاولة من القوي
التي لم تحترم إرادة الأمة والتي تهدف دائما الإلتفات علي إرادة الأمة
"بيضحك محمود
فانتديتا , وبيبدأ الشيخ مرزوق يتعصب "
مرزوق : هؤلاء هم
الذين أرادو بالأمة شرا وإنقساما
تكعيب : الله الله
هي وصلت لشرا وإنقساما , ايه اللي حصل يافاندا
فانديتا: بص ياعم تكعيب
, دلوقتي أنت أبنك مات تقبل تأخد العزا بتاعه قبل ماتاخد بتارك من اللي قتله بإيدك
أو تشوف وهو متعلق في حبل المشنقة
تكعيب : ايوا طبعا
فانديتا : طيب لو
انت ابن اخوك مات ولسة حقه ماجاش ونزلت انت واخوك عشان تجيبه حقه وشوية اتصل بيك
اهالي القاتل عشان تقعد معاهم وجابولك عقد عمل في الخليج بس بشرط تحاول انك تهدي
اخوك شوية وانت فعلا عملت كده يبقي انت ايه
تكعيب : متقولش بس
كده ياعم , ابقي دمي بارد ومعنديش نخوة
فانديتا : بس اهو
انت اللي قولتها اهو ده اللي حصل بقي ياعم تكعيب من ساعة ماقاله نعمل برلمان ونستف
امورنا علي كده طيب انا بذمتك هسالك سؤال " في أي إعتصام بعد الثورة الأخوان
قعدوه فيه غير لو حاجة ليها مطالب بالبرلمان , يعني مثلا شوفتهم خرجوا في جمعة
عشان الشهداء , كله عشان ايه الوثيقة والمش عارف ايه , اخر إعتصام يعتبر نزله فيه
يعني بشكل ملحوظ شوية كان بتاع يوليو وكان برضه شي يخص الإنتخابات
مزروق: وما العيب
في ذلك نحن حريصون علي الإنتقال الديمقراطي السلمي من خلال الأليات المعمول بها في
كافة أنحاء العالم , وهو ما تم بالفعل وحققنا " ولله الحمد" حوالي 48,2%
من المقاعد إي إننا حزب الأغلبية هذه واحدة أما الثانية أن الميدان هو ليس حكرا
علي فصيل سياسي بعينه وبالتالي نزلنا إلي الميدان كي نحتفل بالذكري الأولي لثورة
يناير كما نحتفل كل عام " بذكري حرب أكتوبر"
فانديتا: وفين حق
الشهداء وليه انسحبتوه من الميدان ومكملتوش الثورة فين حق الشهداء
مرزوق : أعترض
أولا علي مقولة الإنسحاب من الميدان هذه واحدة أما الثانية " نحن أبطال موقعة
الجمل " ولولا بسالة شبابنا لما نجحت الثورة أما فيما يخص حق الشهداء فهذا
يجب أن يتم من خلال سلطة التشريعية والرقابية المنتخبة والتي هي من المنوط بها
إصدار التشريعات والقوانين التي تقتص لدماء الشهداء
تكعيب : إزاي يعني
وأنتو اول حاجة عملتوها بعد ما أنتخبوته الكتناتني شكرته المجلس العسكري تقدري
تقولي في حد في مجلس الشعب يقدر يعمل أستجواب للمشير " بصفته وزير الدفاع
وجزء من السلطة التنفيذية اللي المفروض أنكم بتراقبوها وتسألوها .
((يصمت مرزوق
قليلا ويبدو مرتبكا يحاول أن يلملم كلماته كي يجبي علي سؤال تكعيب المفأجي))
مرزوق : لا يوجد
أحد فوق القانون والدليل هو محاكمة المخلوع , فالمشير " وإن أخطي " يجب
أن يخضع للقانون
فانديتا : أن أخطي
هو لسة هيخطي يامولانا اومال القتل والسحل والضرب اللي حصل من فبراير لدلوقتي ده
مين يحاسبوه , اقولك انا ياعم تكعيب القصة ومافيها, دلوقتي في صفقة بين المجلس
والأخوان
مرزوق : "
يضحك مرزوق متعجبا من كلمة الصفقة " أين هي الصفقة التي تتحدث عنها دعني أري
مستندا واحدا يدل علي مثل هذه الصفقات التي تتحدث عنها
فانديتا : لا
النوع ده من الصفقات مابيكونش مكتوب ده إتفاق ضمني كده " وبعدين راجع تصريحات
جماعتك عن الخروج الأمن للمجلس يعني ايه خروج أمن أنا عايز افهم " وبعدين
يعني ايه الناس تبقي داخلةالميدان تهتف " يسقط يسقط حكم العسكر" وتدخلوه
في وسط المسيرات وتحاوله تغطوه علي الهتاف بالميكروفونات بتاعتكو , تفسر انت بإيه
يامولانا لما تبقوا عايزين تغطوا علي هتاف ضد العسكر مش ده معناه انكوا كده مؤيدين
لسياسته الفاشلة اللي وديتنا في ستين داهية
مرزوق : لاتدعي
باطلا ,لسنا مؤيدين للحكم العسكري فنحن من
ذُج بنا في السجون طيلة الستون عاما الماضية ونحن من حُكمنا عسكريا , ونحن
فانديتا : ياشيخ
كل ده انا عارفه بس يعني ايه لما تنشر في جريدتك " خبر بيقول انه في مخطط
لحرق البلد" هو نفس كلام العسكر يبقي ليك مصلحة معاه ولا لا ايوا طبعا ليك
مصلحة بدليل انه مررك لك الإنتخابات وما وقفش عند الإنتهاكات اللي عملتها لأنه عارف
أنك هتاخد أغلبية في مقابل انك تضمنه وضع خاص في دستوره وهو ده اللي وقفت عليه
قيادة حزبك وبعدين احنا في ثورة وبنكملها اولا عشان نجيب حق اللي مات اللي ولا
مجلس شعب ولا غيره هيجبيه لأن اللي بيرعي مبارك هو المشير وطول مالمشير أمن مبارك
أمن والعادلي أمن ومحدش هيجب حق الشهداء
مرزوق : ولكن مع
تسليم البلاد لجهة مدنية منتخبة سوف يحاسب كل من أخطي
فانديتا : مفيش اي
حاجة تضمن كلامك غير حاجة واحدة " نكمل ثورتنا ونختار اللي إحنا عايزنه
بإيدينا" ما إحنا عارفين ان العسكر هيسلمه السلطة بس امتي
مرزوق : في يونيو
المقبل كما أعلن سيادة " المرشد " أقصد المشير
فانديتا : عقبال
ما يجي يونيو اللي جاي تكون الادلة اللي تدينهم ضاعت ويكون مبارك طلع براءة وخد
طيارة وعلي برا ولا تعرف تعمله حاجة ولا هو ولاالعادلي ولا حتي المشير , ده اولا
ثانيا لو اتكتب الدستور والمجلس العسكري لسة في الحكم يبقي هيتكتب لصالح المجلس
ويحمي مصالح المجلس الخاصة بجنرلاته يبقي وزير الدفاع هيبقي هو رئيس الجمهورية
الفعلي يبقي الجيش هو اللي حاكم البلد
وبعدين انت مش واخد بالك ان المجلس داس علينا كلنا لما خالف الإعلان الدستوري
مرزوق : ازاي بقي
خالفه إنتخابات مجلس الشعب اتعملت وانتخابات مجلس الشوري شغالة وبعدها الدستور
وبعدها الرئاسة
فانديتا : اها بس
نسيت ان المادة 189 اللي انت قلت عليها نعم ايه هي " ان بعد المجلسين ما
يتشكلوا يأمر رئيس الجمهورية الجديد المجلس بعمل دستور , معني كده ان انتخابات
رئاسية هتيجي الاول وبعدين م الاخر كده المجلس عايز يعمل الدستور قبل ما يجيب رئيس
عشان مش هيرضي برئيس له صلاحيات مطلقة ممكن يقيد دور المجلس العسكري في الدستور
اللي جاي وده الللي مش عايز المجلس عايز يعمل دستور تفصيل عن طريق شوية من بتوع
الاستشاري علي شوية من النقابات اللي موجودة من ايام مبارك علي كام عضو معين علي
كام عضو في الشوري ويطبخ المسألة
------------------------------
أهلا بيكم
مستمعينا قارئ راديو " طز " وحلقة جديدة من برنامجكم " ع
المصطبة" للأسف غيبنا عنكم في الفترة الأخيرة لظروف مصطبية شعبية برلمانية
ثورية . المهم عشان منطولش عليكم خلونا ننزل علي مصطبتنا مصطبة راديو "
طز" ونشوف اي الكلام اللي داير اليومين دول علي المصطبة بس في الاول خلينا
نرحب بضيوفنا اللي وحشناهم ووحشونا هيكون معانا
فيلسوف المصطبة
الأستاذ " محمود تكعيبة "بنرحب بحضرتك
تكعيبة
" اهلا اهلا بكل مستمعينا وبنرحب بيكم وبنرحب بحضرتك
وكمان هيكون معانا
الأستاذ "مرزوق عبد الرازق" المتحدث الرسمي لأي حاجة بدقن
عبد
الرازق" وعليكم السلام ورحمة الله وبركاته وأهلا بكل مستمعينا من المصرييين
الأحياء منهم والأموات
وكمان هيكون معانا
ضيفنا الثورجي الدائم الأستاذ " محمود خريطة " الخبير المصطبي العالمي
وصاحب نظرية " قسمنا نعيش متقسمين"أهلا بحضرتك أستاذ "خريطة"
خريطة
" اهلا اهلا وبرحب بكل مستمعينا وبحب احذر كل الناس اللي بتسمعنا او بتقري
راديو " طز " انهم يبعدوا عن شاشة الكمبيوتر مسافة 15 سم ولو معاهم
لابتوب برضه يبعدوا 15 سم ولو معاهم اي باد او اي قون بلاش يوجعه عنيهم ويقروا طز
مستمعي راديو طز
" خلينا نشوف ايه الحديث الداير علي المصطبة اليومين دول "
"بيدخل الأستاذ مرزوق وباين علي وشه انه قرفان ومتضايق "
مرزوق " السلام عليكم
تكعيبة
" وعليكم السلام ياشيخ مرزوق مالك شايل طاجن ستك ليه كل ده عشان المرشح
بتاعكو خسر في دايرتنا في الانتخابات ياسيدي مانتو قشيتوا اغلب الدواير التانية
والمجلس خلاص بقي بتاعكو
مرزوق
" رفم تحطفي علي اسلوبك في الحديث والذي ارفضه رفضا قاطعا فحديثك عن مجلس
الأمة وكأنه محلا تجاريا نشتريه أو نستأجره هذه واحدة أما الثانية فهو أننا دائما
ما ننادي بالتوافق بين كافة التيارات والقوي السياسية في المجلس المقبل حتي يصبح
معبرا عن الشعب بأكمله هذه أخري , ثالثا ليس هذا مايجعل علي وجهي العبوس
تكعيبة
: اومال ايه بس ياشيخ مرزوق
مرزوق
" هل تعيش ياخ تكعيبة في عالم تاني أتاكد من انك من عام تاني كما قال
الاستاذ مدحت صالح " انت اكيد من عالم تاني" الم تقرا الصحف الم تشاهد
برامج التوك شو الم تلاحظ ازدحاما علي محطات البنزين والسولار , لقد قضيت اليوم
أكثر من ثلاث ساعات حتي أتمكن من " نفويل " سيارتي ذات الدفع الرباعي ,
يبدو إنك لست علي دراية بمايحدث حولنا حدثه يأخ خريطة عن أزمة البنزين والسولار
خريطة
" يااااااااه ياتعكيبة هو انت معرفتش انه في ازمة في البنزين في البلد كلها
ولا ايه
تكعيبة
" لا والله ياخويا مستمعتش مانت عارف لاعندي عربية ولا معايا فلوسها لكن ايه
سببها
خريطة : بص ياسيدي لحد دلوقتي محدش عارف ايه سببها
مرة واحدة كده مبقاش في بنزين وكل المحطات ادزحمت تسال ليه يقول اصل الحكومة هتغلي
البنزين والسولار وتسمع كلام المسئولين يقولك مفيش ازمة وفي نفس الوقت يقولك ان
سبب الازمة اشاعة انتشرت بين الناس بتقول ان البنزين هيغلي وعشان كده الناس راحت
جري ع المحطات وه اللي سبب الازمة ووزير التموين يقولك السبب وزارة البترول ووزارة
البترول تقولك السبب وزارة المالية وده يرومي علي ده وده يرمي علي ده ومش هنخلص
ومش عارفين لحد دلوقتي سبب المشكلة
مرزوق
" ولما لا تقول بإن هذه الأزمة مفتعلة كي تظهر نواب الشعب المنتخبين في وضع
صعب أمام الحكومة التي هي مسئولة عن الأزمة في الأساس وذلك حتي يلجأ الشعب إلي
نواب الشعب لحل المشكلة مما قد يؤثر علي الناخبين في إنتخابات مجلس الشوري القادم
,كما انها قد تكون خطة للإلهاء بعض القوي التي تسعي لتدمير البلاد في الذكري
الأولي للثورة
تكعيبة
: تدمير ايه بس ياشيخ مرزوق
مرزوق" اي نعم تدمير الاتعلم بان هناك مخططا في
الخامس والعشرين من يناير من بعض القوي التي تريد الالتفاف غلي الارادة الشعبية
وإسقاط الجيش المصري العظيم بهدف تنفيذ مخطط الفوضي الخلاقة تمهيدا لتقسيم مصر في
ظل مشروع الشرق الاوسط الكبير وايه بس الي دخل البنزين في كل ده ياشيخ مرزوق , ما
تحضرنا يأستاذ خريطة
خريطة
" بصوا بقي ياجماعة مشكلة البنزين ليها بعد تاني خالص محدش واخد باله منه
انته مش واخدين بالكم من ان ايران بتهدد بانها تقفل مضيق هرمز وده طبعا هيكون لي
اثر علي سعر البترول وبالتالي هياثر علي سعر البنزين وعشان كده حصلت الازمة
تكعيبة
" ايران ايه بس يا استاذ خريطة
ومضيق ايه مانت عارف اننا اصلا بننتج 95% من البنزين بتاعنا والباقي بنستورده يعني
حتي لو ايران قفلت مضيق هرمز وباب المندب وخليج العقبة وخليج نعمة كمان ملناش علاقة احنا بده كله انا اقولك ايه سبب
المشكلة يمكن يكون موضوع بعثة صندوق النقد الدولي لما كانت عندنا هنا الاسبوع الي
فات طالبو انهم عشان يسلفونا 3 مليار نرفع الدعم عن البنزين ويمكن الحكومة حاولت
تعمل كده وانتشرت الاشاعة اللي خلت في ازمة أو يمكن المجلس العسكري هو اللي عمل
كده عشان يلهي الناس عن يوم 25 اللي جاي او يمكن يكون عشان عمال شركات البترول
كانوا عاملين اضراب عشان ياخدوا حقوقهم والانتاج قل وعشان كده حصلت الازمة, بس انا
مش شايف انه في ازمة
مرزوق: لا توجد ازمة في البنزين , كيف الا تري
طوابير السيارات امام محطات البنزين؟
تكعيبة
: مهو ده اللي انا بتكلم فيه مدام فيه طوابير يبقي في بنزين في المحطة
لكن لومفيش بنزين هتلاق المحطة قافلة
وتقولك مفيش بنزين
مرزوق : وهو ماحدث بالفعل لقد ذهبت بالامس للعديد
من محطات البنزين ووجدتها بالفعل شبه مغلقة.
تكعيبة : يبقي لو في ازمة فعلا يبقي العالم تجار
السوق السودا هم اللي يمكن السبب في بياخدوا الينزين ويبعوه في جراكن كمان
الموتوسوكيلات اللي كترت اوي بعد الثورة وبتستخدم بنزين 80 هي اللي عملت المشكلة ,
بس سيبك انت انا مش مصدق كل الكلام اللي اتقال ده اقولك انا ايه السبب
مرزوق " افيدنا يأخ تكعيبة افادك الله
تكعيبة
" انا ليا واحد صحبي شغال في محطة بنزين ومن كام يوم قالي انه شركات التكرير
اللي هي تابعة للهيئة الهامة للبترول المفروض انها بتوزع البنزين علي شركات
التوزيع وشركات التوزيع بتقول انها موصلهاش اي بنزين يبقي كده شركات التكرير
التابعة للهيئة اللي هي تابعة للحكومة اصلا موفرتش البنزين وده بيحصل ليه اقولك ,
عشان اصحاب الشركات يفتعلوه ازمة علي الفاضي ويقدره يحققوه اعلي ربح عن طريق البيع
باسعار عالية اثناء الازمة في السوق السودا وكمان الناس اللي بتهرب الغاز والبنزين
لغزة بسعر عالي عن طريق السوق السودا برضه وكمان اللي انت متعرفوش انه في ناس في
الوزارة بيهربوا الغاز لبلاد برا عن طريق السفن اللي بتعدي في قناة السويس يعني في
الفترة الاخيرة دي اتهرب حوالي 700 الف لتر بنزين , وكل ده السبب في الازمة يعني
لا الثورة والانتخابات ولا يحزنون
-------------------
أهلا بيكم مستعميعينا قارئ راديو ( طز ) وحلقة جديدة من برنامجكم ( ع
المصطبة ) واللي مش هتقروا ولا كمان هستمعوا ولا حتي تشوفوا غير علي راديو طز (
راديو اللسان الطويل ) يعني م الاخر كده بقولكوا ياناس ياطزواية ياشعبيين فككوا من
الراديوهات التانيين وكم بيكم بيبيكم كم , المهم بقي عشان مكي ما
يجيش يقولك حقوق ملكية وفيس بوكي وفيس بوكك بقولك فكك , يلا بينا نروح علي مصطبتنا
النهاردة ونشوف ايه اللي بيحصل هناك , بس خلينا في الاول نرحب بضيوف مصطبتنا
الأعزاء هيكون معانا النهاردة .
فتحي أبو قورة : مترشح في الانتخابات اللي جاية علي طول ديه واللي لسة
مش عارفين هتتنيل علي عينها وتيجي امتي الظاهر الطريق واقف كالعادة
مرزوق عبد الرزاق : ضيف المصطبة الكريم واللي غايب عننا بقالو كام حلقة
وافكركوا بيه ( مرزوق هو المتحدث الرسمي لأي حاجة بدقن في البلد اليومين دول )
الأستاذ س تكعيب : وهو المراقب الدولي لكل كل حاجة بتحصل ورا
الستارة
(( كالعادة بيدخل الأستاذ مرزوق وهو وشه مكرمش
وشكله كده متضايق وكالعادة ماسك في ايديه جورنال احمر في اسود ))
مرزوق : السلام علي من أتبع الهدي
أبو قورة : وعليكم السلام يامولانا ورحمة الله وبركاته , تعالي أتفضل
ده إحنا حصلت لنا البركة
س تكعيب : عليكم السلام يامرزوق ايه مالك باين عليك متضايق
مرزوق : الا تري يأخ تكعيب ان الذي يحدث في الأيام القليلة الماضية هو
شئ يدعو إلي التفاؤل والبهجة أم شئ يدعو إلي العبوس والأحباط
س تكعيب : ايه بس اللي حصل تاني , اردوغان راجع مصر تاني
مرزوق : بغض النظر عن تلك التلميحات التي ليس
لها محلا من الإعراب , لكني يأخي لا أفهم ما الداعي في تجاهل مطالب القوي والنخب
السياسية بتغيير قانون الدوائر الأنتخابية وجعله بالقائمة النسبية والغاء هذا
النظام الفردي
س تكعيب : وهو ده اللي مضايقيك يعني مهو من من ساعة ما انسحبتوا من
الميدان والمجلس ماشي في اتجاه والدنيا كلها ماشيية في اتجاه تاني
أبو قورة : وانت ايه يامولانا اللي مضايقيك في موضوع القايمة ده
متسيبوا اللي يترشح يترشح يعني ايه اللي هيجرا
مرزوق : ياعم أبو قورة إن هذا النظام سوف يتيح لفلول النظام بالعودة
إلي البرلمان مما قد يسهم في إجهاض الثورة المباركة
أبو قورة : بقولك يامولانا سيبك بقي من الكلام الكبير ده بلا فلول بلا
ما فلولش , منا عندك اهو مترشح في الانتخابات يعني وانا مش في اي حزب واهو عايش
وزي الفل كده ابقي يعني فلول والله هو انتوا كده يابتوع الثورة تتثورجوا
وخلاص لكن تنزلوا تشتغلوا في الشارع وتخدموا الناس مفيش كله شغل حنجوري وخلاص
وبعدين منا زيي زيكو ياشيخ مرزوق انتوا بتوزعوا ازازتين زيت وكيلو سكر انا بقي
بدبح وغير كده مشغل نص عيال الشارع بتاعي يعني كده تبقوا انتوا كمان فلول
وبعدين انا مش فاهم يعني انتوا خايفين من ايه معروف انكو هتبقوا اغلبية
متتحدوا مع بعض ضد اللي انتوا بتقولوا عليهم فلول وتقف قدامهم ولو كله بيبص
للمصالح ياعم صالح , يعني انت كدده اديني عقلك كام واحد هينجح من الفلول 10 % كام 20 % برضه انتوا اغلبية وحتي لو نجحوا كلهم يبقي ده فشل منكو انتوا انك
مقدرتوش تقفوا قدامهم ومتقوليش بقي الانتخابات ممكن تتزور والكلام الفاضي ده ولو
اتزورت ياسيدي هيعملوا ايه يعني هيرجعوا حسني مبارك تاني مانتوا ياجدعان المفروض
انكوا هتبقوا واقفين لاي حد بالمرصاد وبعدين عايز اقولك البرلمان اللي جاي ده
بالصلاته علي النبي كده هيبقي متنيل بنيلة او حاة هتحصل الناس هتنزل ع التحرير
تقولك مشوا العضو الفلاني ايه ياعم انتوا مش من هنا ولا ايه , وبعدين انا سامع ان
العيال بتوع 6 ابريل عاملين حملة عشان يعرفوا الناس ازاي تنتخب هي دي العيال الصح
مش اللي عاملين يتنططوا في التلفيزيون من قناة للتانية , طيب عايز اقولك علي حاجة
انا ليا واحد ساكن في اكتوبر بيقولي انه مش هينزل ينتخب
س تكعيب : ايه بقي السلبية دي ده يبقي انسان سلبي جدا علي فكرة
ابو قورة : سلبي ليه ياحبيبي لما يكون كل يوم بيطلع حزب ومفيش ولا مرشح
من اي حزب راح عندوا كل اللي راحو مرشحين رياسة قصدي رئاسة بلغتوكوا انتوا
ياثورجية يابتوع التحرير والتطهير , يبقي هينزل ينتخب ليه مدام ميعرفض اصلا وش
المترشحيين في دايرته مش هقولك بقي برامجمهم والكلام الكبير ده ميعرفش وشهم , يابا
كل عايز يطلع في التليفزيون وخلاص وبعدين تعالي قولي كده الناس اللي مرشحة نفسها
في الانتخابات دي مش بتنزل ليه كل المناطق
مرزوق : لماذا ياحاج قورة
ابو قورة : اقولك انا يامولانا منا راجل انتخابتجي قديم وفاهم الليلة , المرشحين يابيه بينزلوا الاماكن اللي نسب التصويت فيها عالية واللي
فيها اكبر تجمعات للناس اللي ليها صوت إنتخابي , طيب انا اعرف مناطق عشوائية
كلها مشاكل وقرف ومكنش حد بينزلها ولحد دلوقتي برضه محدش بيعبرها تسمع انت
عن كوم الشوقافة ولا حكر أبودومة ولا شنشلامون , اها ولا تسمعوا مانت اخركوا
وسط البلد ومدينة نصر قوم يابني انت وهو روح واسمع يامولانا قول لاخواننا يرحمونا
شوية الناس تعبت
----------------------
أهلا بيكم مستميعينا قارئ راديو ( طز ) وحلقة جديدة من برنامجكم ( ع المصطبة ) خلينا ندخل في الموضوع علي طول عشان انا اصلا من امبارح
وانا زهقان وقرفان من الكائنات اللي بتفاجأ إنها لسة عايشة بينا والله بتفأجا
وبيتحفوني بأرائهم المؤثرة بكلامهم المنمق بمعلوماتهم الموثقة بأدلتهم الدامغة وفي
النهاية يقولك ( بيقولو ) إحييييييييييية بيقولوا , المهم عشان منطولش لسانا
أكثر من كده , خلينا نشوف الدنيا فيها إيه النهاردة ع المصطبة , بس في الأول خلينا
نرحب بضيوف المصطبة النهاردة ,معانا :
الأستاذ : محمود مونفاخ راعي حركة عجلة الإنتاج التي توقفت ومن ساعتها
وهو حاطط المنفاخ في بؤئه ومش قادر ينفخ
البروفيسور : سيكا إستقرار مؤسس الصفحة الرسمية لأي حد عايز اي حاجة
يعملها في اي حتة حتي لو علي نفسه مش المهم المهم يبقي مستقر
الست بديعة : أمان ياللي ياللي أمان ياشرطة ياللي تعظيم سلام ( هي
أسمها كده علي فكرة ومتسألنيش إزاي )
عبد الله
سوستا أجندة : سوستا ده بقي تسأله عن أي حاجة يقولك ايه (
إيييييييييييه ياشقيق ) أنت متعرفش والله دي قلة مندسة
(( بيدخل البروف سيكا وفي إيده جورنال أحمر في
اسود ) وعليه مانشيت كبيييييييير ( مليونية أنا جبت أخري ) ووشه مكرمش
ودبلان والبياض الناصع اللي علي وشه والضحكة اللي كانت مرسومة بعرض جبهته أيام
ميخا هتقولي مين ميخا هقولك (مبارك المخلوع ) بس عشان كل ما بيتقال اسمه بسب والعن
ومش طالبة , المهم ياعم انت وهو , نسي الأتوبيس اللي بيقف في علي باب واحد بجنبه
اليمين ده طبعا بعد ما كان يقف يستناه بالنص ساعة , ونسي ونسي ونسي وافتكر حاجة
واحدة ( الأستابيلتي) اللي كان عايش في ايام ميخا ومتقوليش مين ميخا بدل ما
اشتم
)))
سيكا : اتفضل ياعم ادي ميتين الثورة واللي جابوا الثورة
مونفاخ : هااااااا ايه اللي حصل تاني احنا ناقصين اللي يخريبيتهم
سيكا : قال ايه ياخويا البشوات عاملين ميلونية قال ومسمينها ايه (
مليونية احنا جبنا اخرنا )
بدعدع : شوف شوف ياخويا قلة الادب قال ( جبنا
أخرنا ) قال والنبي دي عالم أهلها ماربوها وهو احنا علي زمنا ياسيكا ياخويا كانت
البت تنزل من بيتها ببجاحة كده ( واخد بالك انها اصلا قاعدة في وسط 3 رجالة )
مونفاخ : إلهي يخرب بيوتكوا يابُعدة كفاية بقي حرام عليكو وخلو العجلة
تمشي
سوستا : ياشقيييييييييييييييق أنت مش فاهم الناس
دي بتقبض وبعدين انت ماشوفتش الصورة بتاعت ممدوح حمزة وهو قاعد بيشييش في الميدان
ولا ايه هما دول الثوار الاطهار الاحرار الابرار ولا صورة البت أسماء وهي برا في
صربيا ولا الواد اسمه ايه ده بتاعت 6 إسرائيل ( حركة السادس من أبريل الأحتجاجية ) لما كان ماسك السلاح وبيضرب عليه اسمه ايه ياشقيق الواد ده
مونفاخ : احمد دومة يامعلم
سوستا : أها هو دومة ده , وبعدين انت ماشوفتش
الأستاذ أحمد إيزبابير وهو بيتكلم عن الحركة الماسونية اللي دخلت علي مصر
فجأة ومخططات يابني الشعب ده مضحوك عليه
بدعدع : ايوا والله ياخويا عندك حق هو انت ماشوفتش الشيخة اللي قالت
انه ( مبارك المخلوع ) من الأشراف جابوها وهي بتقول أنها يوم موقعة الجمل كانت
واقفة مدية وشها للنيا وبتدعي ان ربنا يحمي مصر والمصريين وفجأة , بيظهر زورق جاي
من الناحية التانية ( اللي هي دولة الزمالك يعني ) ولما بتشوف الناس دول , هما من
نفسهم كده بيجوا يقولولها ياحاجة احنا جايين من ايران البر التاني عشان نقتل ناس
ونمشي
( فجأة كده بقي في يهود في مصر بقيت الحركة
الماسونية قاعدة في التحرير والشيعة في المنصورة والوهابيين في إٍسكندرية وسويسرا
في شرم الشيخ والحوت الأحدب في الغردفة وإسرائيل هي اللي بعتت القرش بالجي بي إس
عشان تضرب لنا السياحة )
بيبص لها سوستا بنظرة الواثق المنتصر وبيرفع حاجب وينزل التاني ويقفل
نص عيني ويقولها : مش بقوليك يابديعة أجندات
سيكا ايستابلتي : ياخونا حرام عليكو بقي سيبوهم يعملوا انتخابات ونتنيل
ونخلص وبلاش بقي مظاهرات عايزين نعيش في استقرار ياخوننا كفاية بقي خربتوا البلد
(( بيدخل عليهم الشاب س تكعيب )) طبعا فاكرينه بس
هو هيقولهم كام كلمة زي الفل
تكعيب : ايه يااخواننا حرام عليكوا انتوا حرام
عليكوا نفسكو لو انت عايزين تفضلوا عايشين عبيد خليكوا عبيد وسايبوا الي عايز يشم
نفسه طيب ممكن اسألكوا كام سؤال واحاول اجاوب بالنيابة عنكم,
سوستا : أتفضل ياحبيبي وماله
بدعدع : هي دي بقي الديمقراطية اللي بتقولوا عليها
تكعيب : أنتوا مين
سوستا : الله ودي عايزة سؤال برضه ياشقيق ( وهو رافع حاجبه برضه )
بروف سيكا : أحنا مصريين زينا زيك
تكعيب : وهو انتو ليه شايفين ان انا بخونكوا
المهم المهم مين بقي أنتوا انا اقولكوا
أنتوا اللي عاملين ترددوا كلمة الأستقرار الأستقرار يعني أيه أستقرار
ولو انت شايف انه انك تبقي عايش كده هل شايف برضه انه ابنك ممكن يعيش في استقرار , لا أنا هقولكوا انت اخدتوا علي التنبلة مانتوا بقالكوا كتر من 50 سنة
روح يبقي روح تعالي يبقي تعالي , انا اقولكوا انتومين ,انتوا اصحاب ( القلة
المندسة .الاصابع الخارجية , خربتوا البلد , مصر مستهدفة , كرامة مصر ) الغريب انها نفس الكلمات وفي المناسبات اللي كان ميخا بيرددها في
التعامل مع اي ازمة
انتوا اللي أيدته ( قفل المعبر ) عشان الاستقرار لما الغزاوية كانوا
محاصرين بالجوع من ناحية وبقنابل الفوسفور من ناحية وانت اللي انتفضتوا لما (
الفلسطنين ) بص بقي اللي جاية دي ( أقتحمواااااااااااا ) الحدود المصرية
وأعتدوا علي أمنها القومي أيه ياواد الحنان ده ياولا .
أنتوا اللي اتصلته علي التليفونات تعيطوا لما ميخا قال ( انا هموت هنا
مليش دعوة ) وساعتها قولتوا ارجعوا بقي الله
يخربيتكوا البلد مستهدفة , وهما اللي اتصلوا بالتليفزيون عشان يدعوا لحرق الميدان
واللي فيه
انتوا اللي لما الناس طالبت ان شفيق يمشي رفضتوا مش لا سبب غير (
العجلة والأستقرار )
انتوا اصحاب المعلومة المجهولة ولما حد يسألكوا عرفت منين يقولك (
معروفة ياشقيق )
انتوا الي لعنته أعتصام 8 يوليو وفي نفس الوقت لما الاعتصام جابلكوا
مبارك علي سرير في التليفزيون , خرجتوا تهللوا وتتفاخروا وتقوله دي لحظة تاريخية ( اللحظة دي الي صنعها مش انتوا اللي صنعها العملا الخونة ولاد الكلب
اللي خربوا البلد)
----------------------
أهلا بيكم مستميعينا قارئ راديو ( طز ) وحلقة جديدة من برنامجكم ( ع المصطبة ) , لما نزلنا علي المصطبة من كام يوم لقينا الحديث الداير
فيها كله عن شئ واحد وهو ( أردوغان ) ولا صوت يعلو فوق صوت أردوغان والترحيب
الشديد من قبل المصريين عموما و ( الإسلاميين ) خصوصا فكلنا أردوغان ولا صوت يعلو
فوق صوت أردوغان , أنبهرنا بأردوغان حتي ذهب البعض منا بالقول بأن ( أردوغان ) هو
صلاح الدين القرن العشرين , المهم عشان مانطولش عليكوا عشان عارفين أن الجو حر
والإشارات واقفة والمحور كمان واقف والبلد بقيت زي الزفت , خلينا نروح نشوف
مصطبتنا بس في الأول خلينا نرحب بضيوف مصطبتنا النهاردة , هيكون معانا
مرزوق عبد الرازق : المتحدث الرسمي لأي حاجة بدقن في البلد
اليومين دول
محمود س تكعيب : فيلسوف عصره وأوانه
الأستاذ محمد خريطة خبير في الشئون المصطبية الدولية وصاحب الرؤي
الثاقبة في العلاقات الدولية يعني م الأخر كده تقدره تقوله خبير مصطبي من الدرجة
الأولي , يلانروح ع المصطبة
بيدخل ( مرزوق ) ع المصطبة ووشه مكرمش
حبيتن وباين عليه أن زعلان بعد الموقف المخزي لأردوغان لما دافع عن العلمانية وقال
أنه ( مصر النظام الأصلح ليها هو النظام العلماني )
محمود س تكعيب : شوفت يامرزوق أردوغان قال ايه النهاردة في الكلمة اللي
قالها قدام مجلس الوزراء ده أكد علي أن النظام العلماني هو الأنسب لمصر
مرزوق : دعه يقل ما يحلو له فأردوغان لايعبر عن
الجمع الإسلامي والمشروع الحضاري الإسلامي كما أن تصريحا كهذا يعد تدخلا في الشأن
الداخلي المصري
محمود س تكعيب : ايه يامرزوق ملاحظ ان لغتك اتغيرت في الكلام عن
أردوغان والتجربة التركية , وبعدين تعالي هنا انت مش روحت اول امبارح عشان تستقبله
عند المطار وفضلت تتكلم عن القيادة التركية ( الإسلامية ) وإحياء الخلافة والكلام
الكبير ده
مرزوق : أعلم بأنك صاحب إتجاه علمانية وهذا إذا
كان يعني شيئا فأنه يعني إتفاق رؤي أردوغان العلماني مع رؤيتك صاحبة فصل الدين عن
السياسة
محمود س تكعيب : ايوا بس تركيا ما حصلش فيها تنمية إقتصادية غير
مع تولي حزب الحرية والعدالة , قصدي العدالة والتنمية , الحكم
مرزوق : أراك تبعث إلي بتلمحيات لا مبرر لها
محمود س تكعيب : ياعم لا اله الا الله , حد جاب سيرتكم دلوقتي وبعدين
مش ده كلامكو انكم بتأيدوا مدنية الدولة اللي فيها المواطنين متساويين وتكون دولة
قانون , وبعدين بعيدا عن كل الكلام ده ,
أيه رأيك يأستاذ خريطة في الزيارة بس وبعدين احنا عايزين نعرف ايه سر
التحول كده مرة واحدة , وبعدين هل تصوير أردوغان بأنه بطل علي حساب مصر
خريطة : بص ياحبيبي في حاجات كتير اوي انتوا مش واخدين بالكوا منها
س تكعيب : زي أيه متنورنا يأستذة
خريطة : تركيا ياحبيي بعد الأنتخابات اللي فاز
فيها حزب العدالة والتنمية بقي عندوا شعبية كبيرة اوي وشاف انه لو كان موقفه ضعيف
في التعامل مع موضوع إسرائيل ممكن يخليها تفقد شعبيتها وده طبعا بعد ما أيدت تدخل
الناتو في ليبيا وبعد ما تم تصويرها في الإعلام السوري والإيراني علي أنها مشتركة
في المؤامرة علي سوريا ده من ناحية من ناحية تانية ان تركيا بتلعب علي كل الاوتار
وده في مجال السياسة الدولية شئ مقبول ومن مصلحتها طبعا , بص ياحبيبي أردوغان
بتصريحاته قبل الزيارة والأستقبال الشعبي والأهتمام الإعلامي بالزيارة كان عايز
يوصل رسالة لأمريكا وهي ( انتو عندكوا في الشرق الاوسط حليفين تركيا واسرائيل )
تعالو شوفوا استقبال شعوب الشرق الأوسط للحليف التركي عامل ازاي وكرههم للحليف
الثاني ( إسرائيل ) عامل إزاي وبكده يضرب كذا عصفور بحجر واحد , أما بقي بالنسبة
لموقفه من العلمانية فهو الراجل قال أنه مسلم ورئيس وزراء دولة علمانية وقال ان
الدستور التركي العلماني يعني انه بيتعامل مع كل الأفراد بشكل متساوي بغض النظر عن
دينهم وده بيوضح أختلاف وجهات نظر ورؤي حزب العدالة والتنمية عن رؤية الأخوان
المسلمين وده السبب ان كلام اردوغان ماعجبش الاخوان المسلمين في مصر واللي عايزين
في رأيي تثبيت نموذج ( الجماعة – الحزب ) لانهم عايزين يحتفظوا بقدرة الجماعة علي
الحشد لما لها من تأثير علي البسطاء من أجل الحشد وده اللي بيثبت أستخدامهم للدين
في الدعاية الأنتخابية بأسم الجماعة اللي هي المفروض دعوية , والأهم من كل ده ان
كلام اردوغان بيثبت أن ( الفزاعة ) اللي بيستخدمها الأخوان
في التخويف من التيارات العلمانية في مصر تحت مزاعم بأنهم يحاربون الدين ويريدون
العبث والإفساد , وده اللي بتحاول الجماعة تعمله وتحط الشعب المصري في خيارين اما
الإسلام ( نحن ) وأما العلمانية ( هم ) وهو أسلوب دعائي
رخيص
محمود س تكعيب : انت عارف ايه اللي انا خايف منه يأستاذ خريطة , أن
الكلام الكتير اللي ظهر فجأة بعد زيارة أردوغان من محاولة للهيمنة علي الشرق
الأوسط وتدخل في الشئون الداخلية المصرية ومحاولة تصدير النموذج العلماني
التركي أنها تنتهي بمظاهرة بالإعلام السعودية عند السفارة التركية والمطالبة بطرد
السفير التركي ( العلماني ) وتكون تحت أسم ( جمعة أردوغان )
مرزوق : وهذا ما نسعي إليه وهو ما سنحاول الحشد من أجله بإذن الله ,
والله الموفق والمستعان
--------------------
أهلا بيكم مستميعنا مستمعي راديو ( طز ) وأولي حلقات برنامجكم ( ع المصطبة ) واللي هننقل لكم فيه كلام المصاطب زي ما بنسمعه أو بنرمي
ودننا عشان نسمعه كالعادة , المهم عشان متزهقوش خلينا نروح نشوف في إيه بيتقال علي
مصطبة طز مصطبة اللسان الطويل ونشوف ايه اللي بيتقال عليها اليومين دول , لما
نزلنا ع المصطبة لقينا أن أغلب الكلام اللي داير علي المصطبة هو الكلام في موضوع
السفارة الملعونة واللي حصل فيها والسور اللي اتهد علي دماغ اللي عمله ( اللهي ما
يوعوا يبنوا تاني ) في البداية خلينا نرحب بضيوف مصطبتنا النهاردة هيكون معانا
- سعيد كنبة وهو المتحدث الرسمي للكنباويون علي المصطبة وهتلاقوه كتير ع
المصطبة
- الأستاذ الشوان تخوينة المتحدث الرسمي بإسم إئتلاف بروتوكولات حكماء
زاهيون وده برضه هتلاقوه موجود معانا كتير وده بقي كل همه التخوين وشايف ان الدنيا
دي عبارة عن بروتوكول بيتنفذ
- محمود تكعيب وده دايما بيحب يشوف الي بيحصل ورا الطبيعة ودايما يلفسف
الأمور بفلسفته المتلفسفة
- مرزوق عبد الرازق وده زي ما تقوله كده المتحدث الرسمي لأي حاجة ليها
دقن في البلد اليومين دول .
بيدخل ( كنبة ) علي تكعيب والشوان ومرزوق ,
وطبعا أول ما بيشوفهم مفيش غير كلمة واحدة علي لسانه وهي ( الله يخربيتكو ما
تهمدوا شوية ) !!
تكعيب : ايه بس اللي حصل ياكنبة مالك جاي قالب وشك ليه كده
كنبة : قالب وشي يعني انت مش شايف اللي عملته
في البلد الله يخريبيت الثورة ياعم احنا مش عارفين نعيش وناقصة كمان حرب يلا
خليها تخرب اكتر ماهي خربانة والنبي يعني انت اللي موديكوا عند السفارة بتاع
اليهود ورايحين ليه تقتحموا السفارة خلاص كلها بقيت ( الشحات ) متوهمش نفسك
ياحبيبي هي شقة واحدة اللي بتطلع مفيش شقق تاني خلاص
تكعيب : هههههههه شقة ايه بس ياكنبة انت شايف
يعني الحكومة عاملة مسابقة للي ينزل العلم ياخد شقة , ده علي كده بقي اللي ينزل
علم السعودية ياخد برميل بترول ولا طبق كبسة متر في مترين , بقولك ايه ياكنبة خليك
في كنبتك ومتتكلمش وخلاص
شوان : هو ايه اللي يخليه في حاله , ياعم انت
مش حاسس باللي بيحصل حواليك انت شكلك كده مش داري بالدنيا انت مسمعتش عن ( كامب
ليبرمان ) ومشروع مخطط ( برنارد لويس ) إن شاء الله هتتقسم وابقوا قولوه شوان قال
افتكر يابني القعدة دي وبعدين هنرجع نقول ولا يوم من أيامك ياحُسحُس
كنبة : أها والله , الله يمسيك بالخير ياريس مطرح مانت قاعد ربنا يفك
سجنك
مرزوق : اللهم أحشر من يترحمون علي أيامه معه ,
ثم حدثني يأخي ماذا جري وأين هو الأن إنه ينعم في المركز الطبي العالمي ثم ما الذي
يجعلك تترحم علي أيامه ويكأننا كنا نعيش في رغد ورفاهية
كنبة : ياعم ولا رغد ولا رفاهية ولابتاع بس علي الأقل كنا بنام من غير
ما نقفل الباب بالترابيس
تكعيب : يعني أنت كنت عايش في أيام المخلوع في
أمان أهاااااااا وماله مانت عشان مجاش امين شرطة معفن يوقفك في الشارع ولا دخل
عليك قبل كده حد ظابط من بتوع أمن الدولة وخدك من سريرك في عز الليل ولا عمر عساكر
الأمن المركزي سحلوك في الأرض
كنبة :يعني أنا عايز افهم يعني ايه اللي يخلي الثوار الأطهار الأحرار
الأبرار يروحوا ناحية السفارة ومش بس كده لا كمان يقتحموها وبعدين ايه اللي يخليهم
يقتحموا كمان مديرية الأمن
تكعيب : يابني أفهم وشغل دماغك شوية , دي
لعبة كبيرة عشان قانون الطوارئ يرجع تاني وهو ده اللي حصل , وبعدين انت مش
واخد بالك من انه كان في بيان رقم 74 حذر اي حد من انه يقترب من اي منشاة حيوية
وهي وزارة الدخلية دي مش منشأة حكومية ولا ايه وبعدين انا عايز افهم برضه ازاي
الناس دي طلعت كده وعساكر الجيش والأمن المركزي سابوهم كده يطلعوا ويقتحموا ايه
هما قرود يعني ولا بيطيروا ولا يمكن كانوا لابسين طاقية الاخفاء يابني شغل مخك
شوية وانت تفهم
شوان : وانت يعني كنت عايز الشرطة تضرب في الناس ويجيي الناس اياها
اللي بتقبض تقولك الشرطة ضربتنا والدنيا تخرب تاني وبعدين هما قدروا يستغلوا يوم 9
سبتمبر أحسن إستغلال
مررزوق : استغلوا ازاي يعني وبعدين اللي اعرفوا
انه مدام مش قادرين تحكموا الناس يبقي بلاش بقي تدعو لمليونيات غير لما تكونوا
قادرين تنظموا حركتها وتعرفوا هتبدا فين وتنتهي فين عشان المشاكل اللي بتحصل
تكعيب : أقولك انا بقي ع الخلاصة ياناصح انت وهو
وفسرلي انت كده يعني ايه الناس تروح عند وزارة الداخلية ومايلقوش حتي نفر
عسكري عند الوزارة , تخيل انت كدة مسيرة اقدر ادس فيها كام بلطجي انت ماشوفتش
الواد سمينة اللي قال عليه أيمن نور ولا ايه بس كده ببساطة الامور بقيت واضحة ,
مسيرة يخش في وسطها شوية بلطجية يتعدوا علي المنشأت ويحرقوا كام عربية وبعدها
يقولك السبب في اللي حصل هما الناس اللي دعوا للمظاهرة وبعدها يقولك انهم هيفعلوا
قانون الطوارئ اللي هو اصلا متلغاش وبكده يقدر يمنع التظاهرات
مرزوق : أيوا يأخي بس بنود القانون لم يرد فيها
نصا بخصوص التظاهرات لكنها أجمعت علي بعض أعمال البلطجة والإخلال بالنظام العام
لذلك لم ننزل نحن للشارع وأدا للقتن
تكعيب : اديك قلت بلسانك هو فعلا القانون مجاش فيه حاجة تخص التظاهرات
بس سهل اوي ان المظاهرة في لحظة تتحول لاعمال تخريب وبكده يحق للشرطة فضها بالقوة , وماتنساش برضه انه في إضرابات للمعلمين والأطباء والمهندسين وعمال
النقل البحري وهما بكده بيعطله العمل العام وبيخلو بالنظام وبيخالفوا القانون ويحق
للشرطة انها تفض اي اضراب او اعتصام فهمت ياناصح انت وهو ليه بقي ده حصل وكمان
بترتيب من الشرطة , وبعدين ايه علاقة كل ده بأن المشير ما يروحش يدلي بشهادته في
المحكمة واهو راح يعني العزاء بتاع ابن جمال عبد الناصر مش دي زي ديه وبعدين ايه
علاقة الامن اللي في البلد بأنه مايروحش المحاكمة .
مرزوق : يأخي إتق الله ولا تناقش ولا تجادل فأن
حضور الجنازة فرض بينما الإدلاء بالشهادة سنة وبالتالي من الجائز تأجيله طبقا لفقه
الأولويات .. والله الموفق والمستعان
ليست هناك تعليقات:
إرسال تعليق