حكايات جندي إسمه "مدني " الحلقة الأولي
الولا مدني ابن الست عساكر كبر وشنبه خط علي وشه وهيسيب
الغيط ويخش الجهادية ..
مدني كل يوم في الغيط مع أبوه وأكتر أفلام
يتفرج عليها هي أفلام الحرب "الرصاصة لاتزال في جيبي " و" الطريق
إلي إيلات" وغيرها كتير من أفلام الحرب اللي كل سنة بتتذاع في كل مناسبة
عسكرية
مدني هوايتة الوحيدة هي انه بعد مايخلص الغيط
يجري يشغل الفيديو اللي عمه " عمارة" جابو معاه من الخليج مدني يروح
مابيشوفش غير أفلام الحرب أو يقعد يتفرج
علي المصارعة
غير أن مدني كان دايما يسمع أغاني العندليب
في النكسة والإنتصار من أول " صباح الخير ياسينا" ولحد " عدي
النهار"
مدني ماقدرش ينسي مشهد العسكري الفلاح اللي
اول مايرجع من الجبهة البلد كلها ترحب بيه وتقوله أهلا يابطل وقعدته مع بهانة في
الغيط وهي بتتباهي بيه وهو جواه البدلة الميري وفرحة ام العسكري الفلاح لما الناس تنادي وتقولها عاملة
ايه يأمه البطل ..
ده
الجو اللي اتربي في مدني ,غيط حرب بدلة عسكرية شهادة في سبيل الله والوطن
.. مدني خلاص بلغ سن الجهادية ورايح اهو يشوف
موقفه ايه من التجنيد وعمال يقول لأبوه وأمه أدعولي عشان ربنا يكرمني وأدخل
الجهادية وابقي بطل .
مدني صحي
من الفجر يوم 11 من يناير مش مهم
في اي عام وبعد ماصلي الفجر ودعي وهو بيصلي أنه ربنا ينوله شرف الجهادية لبس هدومه ونبه أمه ماتنساش تدعيله وطيران علي
محطة القطر عشان يلحق معاد كشفه الطبي في الجهادية مهو اصل ساكن بعيد عن المركز
اللي هيكشف فيه ويعرف هو داخل الجهادية ولا لا
مدني طول مهو ماشي مفيش في دماغه غير صورته
وهو لابس البدلة الميري وماسك في ايديه سلاحه ومعلق تعيينه علي صدره ومقفز في
البيادة وماشي بين الرمال يهد فيها ويزلزل الارض من تحت رجله ويرهب إعدائه وهو
بيصيح " الله أكبر تحيا مصر , الله أكبر تحيا مصر "
مدني وصل لبوابة المركز وأول جملة قراها كانت
مكتوبة علي بوابة المركز وهي حديث عن الرسول صلي الله عليه وسلم " إذا
فتح الله عليكم مصر بعدي
فاتخذوا فيها جنداً كثيفاً، فذلك الجند خير أجناد الأرض" صدق رسول الله
" صلي الله عليه وسلم " مدني حث بفخر وهو ماشي وحس أنه بقي سامع صوت من
بعيد بيردد " الله أكبر بإسم الله بإسم الله"
وبعد ماوقف مدني في
الصف عشان يستني دوره في الدخول والكشف جيه عسكري دفعة قديم شوية وباين علي وشه
التكشيرة المعهودة في الجهادية وبدأ العسكري الدفعة يتكلم ويدي الأوامر والتعليمات
العسكري الدفعة "
كل يقف صف واحد , مش هقول الكلام مرتين الكلام هيتقال مرة واحدة كل مواليد سنة 90
يعمل صف علي اليمين واللي قبل 90 يفضل واقف مكانه ومش عايز غباوة ع الصبح عشان
يومنا طويل .
بيهمس واحد واقف جنب
مدني " وايه لازمته الغلط ده ع الصبح"
مدني بيرد بكل براءة
" لا لا ده مش غلط مهي دي الجهادية اومال انت فاكر ايه حزم وإنضباط "
مدني أول ما بيدخل
جواه المركز " بيسمع صوت العساكر اللي بتتدرب وودنه مليانة همسات " ها
ها الله اكبر , ها ها الله أكبر" طبعا مدني كل مابيسمع صوت العساكر قلبه
بيرفرف وبيدعي جواه نفسه ويقول " امتي يارب انول الشرف ديه "
بعد مابيدخل مدني جواه
المركز بيشوف عبارات ولافتات مكتوب عليها جمل تحفيزية زي " العرق في التدريب
يوفر الدم في المعركة" وغيرها من الجمل اللي كل مايشوفها ويقراها قلبه يرفرف
ويفضل يدعي " امتي يارب انول الشرف ديه "
بيصطف مدني جواه الصف
بتاع دفعته وبيجي عسكري تاني يستلم الصف , ومدني شايف كل النظام والإنتظام ده ومش
مصدق نفسه بيدأ العسكري المسؤل عن صف دفعة مدني في الكلام
العسكري "
ياجدعان كل يسكت عشان الكلام بيتقال مرة واحدة انت يابني بص قدامك الكلام بيتسمع
مابيتشتفاش انا بكرر اهو هقول الكلام مرة واحدة , كل يطلع الورق بتاعه ويريتبه
ويمسكه في ايده اليمين ,
بيبدأ عسكري تاني يلف
جواه الصف بتاع دفعة مدني ويختار ناس يطلعها برا الصف
العسكري" انت
وانت وانت وانت ياللي هناك وانت ياللي في اخر الصف " اطلعوا برا الصف ,
شايفين الشباك الي هناك ده هتروح عنده تجيب مكنة حلاقة بجنيه وتقف قدام المرايا
تحلق دقنك
بيحاول واحد من اللي
طلعوا في الصف ان يتناقش مع العسكري ويحاول يقوله انه دقنه محلوقة " ميري
وكمان السالف بتاعه لحد العضمة يعني كله ميري في ميري وبيسأله " يافندم
" بيرد العسكري
العسكري " نعم في
ايه
الشاب " انا دقني
محلوقة
العسكري " انت
هتعدل عليا ياحبيبي نفذ الاوامر وروح هات المكنة
بيبدأ عسكري تالت يلف
في الصفوف وينده " كل واحد يطلع جنيه " هتسألني الجنيه ده ليه هقولك ده
تمن دليل الجندية الي هتاخدوه معاك وانت ماشي
الصف كان حوالي 150
شخص ودول الدفعة الاولي ولسة في دفعات تانية كتير , وهنا بدأ شاب يحاول يحسب
الحسبة لقاها كبيرة اوي ولاحظ مدني انه بيحاول يحسب ورد مدني عليه
مدني " في ايه
ياخويا بتحسب ايه مش العسكري قال انه ديه تمن دليل الجندية "
الشاب " جندية
ايه ياعم انت بتصدق
مدني " ايه بصدق
ديه اها ياحيدق بصدق وماصدقش ليه
العسكري : فيه صوت ليه
ورا في اخر الصف باين عليكوا يومكوا طويل ,كله يسمع هتدخل من الباب اللي جيه يمين
في شمال هتدخل تستني في القاعة لحد ما هيجي واحد ينده عليك عشان تدخل الكشف بتاعك
-----------------------------------------------------------------------------------
-----------------------------------------------------------------------------------
حكايات جندي إسمه "مدني " الحلقة الثانية
بيدخل مدني وكل
الشباب للقاعة اللي العسكري قالوهم عليها طبعا طول ما مدني ماشي جواه المركز بيشوف
لوح مكتوب عليها شعارات وكلمات حماسية وده الشئ اللي بيزود الحماسة جواه بيدخل
مدني جواه قاعة كبيرة كراسيها مصفوفة ازرق واصفر واخضر بيجي عسكري وبينده
كله انتباااااااه
ومسمعش صوت حد عشان الكلام اللي هقوله مش هكرره
بيلاقي شاب باصص
ناحتيه
انت ياحبيبي بص
قدامك يارجالة الكلام بيتسمع ما بيشتفش يعني مش لازم تبص عليا وانا بتكلم عشان
تسمعني وتفهم كلامي مفهوم يارجالة , انت يابني بقولك بص قدامك ما تبصش ناحيني انت
غبي يابني انت بصوا يارجالة العليا وركزوا في كلامي
مواليد من شهر 1
لشهر 3 يقعدوا علي الكراسي الصفرا , مواليد 4 و 5 و6 يقعدوا علي الكراسي الخضرا
ومن غير ما اسمع همسة
شاب من مواليد شهر
6 ملقاش مكان ليه في الكراسي المخصصة انه يقعد فيها وغلطت وقعد علي كرسي ازروق
وفجاة العسكري شافو
العسكري: أنت ما
بتفهمش انا مش قلت كله علي الكراسي الصفرا والخضرا
الشاب : اها
يافندم بس الكراسي اتملت وقلت اقعد علي كرسي ازرق
العسكري: هو
بمزاجك التزم بالتعليمات
يافندم مهو الكرسي
فاضي
العسكري انا شايف
انه فاضي وعارف بس دي تعليمات ولازم تتنفذ ياجدعان كل اللي ملحقكش الكرسي يفضل
واقف لحد مايجي دوره
بتمر ساعتين
والشباب اللي واقف واقف لحد ما كرسي يفضي وبيبدا الشباب يدخله عشان الكشف الطبي
والفحوصات
العسكري : نسمع
الكلام عشان هقوله مرة واحدة اول صف هيقوم يدخل هناك يستلم سلة والعسكري هناك
هستلمك ويقولك التعليمات بالنسبة للناس اللي هنا هيقوموا صف صف ومش عايز اسمع صوت
ولا همس اثناء الحركة مفهوم
مفهموم ... مسمعتش
رد يعني
مفهووووووووووم
بيرد الشباب في نفس واحد : مفهووووووووووم يافندم
اول صف تاني صف
تالت صف قوم اقف ثابت في مكانك , فيه صووووووت ليه مش عايز اسمع همس قلت عشان ما
نزهقش الناس خلي يومكوا يعدي علي خير اسمع اول تلات صفوف هتدخل هناك وهتقف عند باب
الاوضة اللي هناك دي وتنفذ التعليمات الي هتتقالك هناك
بييدا الشباب في
الحركة جواه الصفوف وبيحس العسكري ان الصف بدا يتمايل وهنا يستشاط غضبا
انت ياحمار منك له
اللي ماشي بيتمايل زي البت الحلوة اللي ماشية ع الكورنيش استرجل منك ليه وادخل
جواه الصف والا والله هتقعد هنا لحد اخر اليوم
بيدخل الشباب عند
الاوضة اللي العسكري قالوهم عليها بيلاقول عسكري واقف جواه الاوضة واول ما الشباب
بيدخلوا في منهم اللي اتجرا ودخل خطوة جواه الاوضة
العسكري: اررررجع
كله يرجع علي اول بلاطة وتقف منك ليه واللي هيعدي البلاطة من غير ما انا اقوله
يرجع لاخر الصف من نفسه ولو مارجعش هطلعه يقف في الشمس ساعتين عشان يتعلم الادب
والنظام كله يسمع الكلام خلي اليوم يعدي علي خير من غير مشاكل منك ليه فاهمين
....فاهمين ... فاااااااااااااااااااهمين
فاهمين يافندم
اسمع هتروح اخر
الاوضة تستلم سلة من هناك تقلع هدومك وانت واقف مكانك وحاجتك تحطها في السلة وتمسك
السلة في ايديك انا بقولها ومش هقولها تاني حاجتك
انت اللي مسئول عنها لو حاجة ضاعت انت اللي مسئول عنها احنا مش مسئولين
بيدخل الشباب جوه
الاوضة وكله يبيدا يستلم سلة خاصة بيه وبيقلعوه هدومهم وكله بيقف بملابسه الداخلية
وبيجي العسكري
في صوت ليه منك
ليه كله ثابت ويسمع هتدخل علي العيادة بنفس الترتيب بنفس ترتيب الرقم المسلسل
بتاعك اللي في الورقة اللي معاك وبقولها اهو محدش يخالف النظام كله يدخل بترتيبه
في الورق
بيدخل الشباب بنفس
ترتيب بيقابلهم دكتور لابس بدلة كاكي فوقها بلطو ابيض ماشاءالله شبه الملايكة
كله يدخل علي
الكشوفات وار بعض وبنفس الترتيب كشف عيون عظام بطنة بعدين الكشف العام وفي الكشف
العام اي حد عنده اي مشكلة يقول عليها ابدا اتحرك علي اول كشف
بينهي الشباب
الكشوفات وبيدخل بعدهم الصف اللي فيه " مدني " وبيكون الشباب في الصف
اللي قبله بدا ناس منهم يعرفوا انهم ممكن يخرجوا من الجيش بسبب الاعفاء الطبي
وبيدا الشباب يتكلموا مع بعض وبيسمع " مدني " كلامهم
مبروك ياكبير
"
الله يبارك فيك
يامعلم
انت اخدت البطاقة
الخضرا وكتبلك عليها بالقلم الاحمر
اها طبعا وانت
انا دخلت كشفت
والدكتور قالي استني عشان ليك كشف تاني
مدني بيسمع الكلام
ده وبيدخل معاهم في الموضوع
مبروك ياجندي
ياخويا
الله يبارك فيك
يامعلم
وانت دخلت سلاح
ايه بج(ئ)ا
سلاح ايه ياعم فال
الله ولا فالك انا طلعت اعفاء طبي ان شاء الله
يعني طلعت خلاص من
الد(ج)يش وفرحان ج(ق)وي كيديه ياخي ده انت المفروض تعمل عزاء ليك وتجيب معددة تعدد
فيه
ليه بقي ان شاء
الله ياعم المجاهد
ديه الد(ج)يش كل
البلد حيدانا تتمني ت(ق)جضي فيه ولا حتي ساعة دي شرف يابني لايقدر بمال
طيب ياحبيبي ربنا
يوعدك يارب وتدخل تقضي فيها عمرك كله
وهو انا اطول مهي
دي المشكلة انه يج(ق)ولك بس اقصي مدة 3 سنين عشان كيده اني بفكر اطوع بس لزمن لما
يعدي علي 6 شهور لاول في الخدمة
طيب يادفعة ربنا
ينوي لك اللي بالك وتخش عشرين سنة مش 3 سنين بس
اجري اجري كيديه
ده انت ولا فاهم حاجة ياولا دي الجهادية دي شرف فوج(ق) الرووس
العسكري بيسمع
الهمس في الطوابير وبيدخل كالعادة يزعق
ساااااامع صوت ليه
شكلكوا كده مش ناويين تعدوا يومكوا علي
خير انتباه منك ليه وامنع الصوت مش عايز اسمع همس كله انتبااااااااه
بعد ما دخل "
مدني " علشان يعمل فحوصاته وبعد ما أتاكد انه سليم ومرهل انه يدخل الجيش او
زي مابيسميها " الد(ج)هادية سمع صوت الدكتور بيقول لواحد من الشباب اللي
بيشكفوا سمعو بيقولوا
"مبروك
ياصابر أنت طلعت من الجيش "
الصدمة كانت كبيرة
علي " مدني " وهنا بدا يساءل نفسه هو ايه اللي حصل يخلي الشباب يفرح انه
مش هيدخل " الجهادية " وايه اللي يخلي دكتور كبير زي ده يبارك للشاب
صابر انه مش هيدخل الجيش وبدأ يساءل نفسه هو ايه اللي حصل وفجأة سمع " مدني
" صوت عسكري
كله
انتبااااااااااااااااااااااااه اسمع منك ليه هتخرج من الباب اللي قدامك ده يمين في
شمال في يمين اول بوابة وتيجي يوم السبت اللي جاي تسلم نفسم " أهلا بيكم في
القوات المسلحة "
ليست هناك تعليقات:
إرسال تعليق