الست مدنية وولاد الحاج عسكر

أهلا بيكم مستميعينا مستمعي راديو ( طز ) وحلقة جديدة من برنامجكم ( لسانك حصانك ) وبعد غياب طويل علي جمهورنا الحبيب رجعنالكم بحكاية غريبة شوية حكايتنا النهاردة عن ( الست مدنية والحاج عسكر ) خلينا نشوف ايه الحكاية بعد الفاصل اللي هو اصلا مش موجود . بس أهي كلمة بيقولها وخلاص المهم يلا بينا نسمع الحكاية , بدل الهزي اللي ملوش لازمة ولا بيودي ولا بيجيب

.. 

الست مدنية بنت الست محروسة فضل ولاد الحاج عسكر متجوزينها يموت واحد من ولاد الحاج عسكر يجي واحد تاني من عيال الحاج عسكر ويتجوزها , المهم بعد سنين كتير مرت , قام ولاد الست محروسة عشان اتخنقوا من جوز امهم وولاد الحاج عسكر وبعد انتفاضتهم علي جوز امهم قدره فعلا انهم يطلقوا امهم محروسة ولاول مرة في تاريخها بتحاول محروسة انها تعيش عيشة نضيفة بعد ولاد الحاج عسكر ما تناوبوا علي اغتصابها ونهبها

. 

قوم ايه بقي بعد مابيسبها اخر ولاد الحاج عسكر ( الله أعلم هيكون أخرهم ولا ايه ) المهم بعد ماسبها قال ايه , قالنا انه هيبسبها لاخواته من ولاد الحاج عسكر ويفضلوا قاعدين معاها لحد ما تخلف الست محروسة اول مولودة ليها وهي البت مدنية , الكل مستني البت مدنية وطبعا منهم ولاد الحاج عسكر الي قالنا انه هيبسبها تعيش في بيت اهل امها محروسة زي ماهي اختارت وفضلت سنين كتير تقف في الشارع زي المجنونة تقول نفسي اخلف بت اسمها مدنية , لكن فجأة وعلي غير المتوقع يطلع علينا ولاد الحاج عسكر ويقولولنا قال ايه احنا هنفضل قاعدين مع مدنية لحد ما تكبر وتتعلم المشي والكلام ( هما قصدهم يعني انهم هيفضلوا قاعدين معاها لحد ما تموت ) قال ايه علشان يحموها من اي حد يحاول يقربلها معتبرينها اختهم من ابوهم عسكر الكبير ومن امهم محروسة طيب ده معناه ايه بقي ياخوانا , معناه انهم هيفضلوا قاعدين جنبها كده لحد ما تتولد ان شاء الله ( الله أعلم هتتولد ولا هيتعملها عملية إجهاض بحجة انها ماتت او لو اتولدت هتبقي مشوهة ) طيب وفين ولاد الست محروسة اللي خايفين علي اول اخت ليهم من امهم محروسة هما موجودين بس للأسف ولاد الحاج عسكر قدره يلعبوا اللعبة صح ايه بقي اللعبة دية ؟؟ هقول ياحبيبي ما تستعجلش علي رزقك

.. 

في الاول جم ولاد الحاج عسكر وقاله ايه احنا هنشوف اهل الست محروسة عايزنها تولد ولادة طبيعية ولا قيصرية وبالفعل سألوهم وهنا بقي حصلت المشكلة فيه اللي قال لا لازم تولد ولادة طبيعية زي الحاج سلفي لان الولادة القيصرية حراما حراما حرام وفيه اللي قال لا طبعا ازاي لازم تولد ولادة قيصرية ومنهم ليبرالي أفندي وعلل ده بأن الولادة الطبيعية مش مضمونة وممكن الست محروسة تموت فيها وهي بتولد المهم في الاخر أهلها وافقوه انها تولد طبيعية وده طبعا لانهم عارفين طبيعة اهل الست محروسة وانهم متدينيين شويتين ومنها بدأ الاختلاف وبقي أهل الست محروسة مقسومين بين الحاج سلفي وليبرالي أفندي وده كله طبعا كان بإيعاز من ولاد الحاج عسكر عشان في النهاية يقوله لا انته مش هتقدروا تحافظوا عليها عشان كده هنقعد معاها شوية طيب هيقعدوا معاها ازاي .. أقولك ياحبيبي ما تستعجلش

.. 

قالك ايه احنا نعمل اتفاق كل اهل الست محروسة تلتزم بيه الاتفاق ده بقي عبارة عن ان ولاد الحاج عسكر يكونوا هما اللي مسئولين عن البت مدنية بنت الست محروسة وهما اللي يحافظوا عليها وولاد الحاج سلفي ووالباقي من أهل أم مدنية هما اللي يختارولها تلبس ايه وتصرف ازاي بس لو لبست لبس كده ولا كده هيعترض ولاد الحاج عسكر ويبعدوا الحاج سلفي وأهله لما يلاقوا ان مستقبل البت مدنية في خطر والكلام ده اللي وافق عليه ليبرالي افندي وده طبعا عشان يبقي في حد بيحمي مدنية وهما ميعرفوش انهم كده بيسلموا القط مفتاح االكرار زي ما بنقول عندنا في مصر .طيب هو ولاد الحاج عسكر هيسبوا بنت مرات ابوهم كده ولا ايه اللي هيتم

.. 

الي هيتم زي مابقولك هما هيخلوا الحاج سلفي وعيلته مسئولين عنها ويجيبه واحد من كبار العيلة يختاروا اهل الست محروسة عشان يبقي هو كمان ليه بعض المسئوليات الخاصة بالبت مدنية يعني هو لما تحب مدنية تتجوز ولا حاجة هو اللي يجيب لها عريس حليوة من بلاد برا يعني هيشتغل خطبة يعني وجوده من عدمه مش هتفرق بس هو شكل وخلاص وتبقي الامور كلها في ايد ولاد الحاج عسكر بحجة انهم بيحفظوا علي تربية البت مدنية عشان متبقاش علي حل شعرها , طيب وكبير الحاج عسكر هنعمل في ايه مش هو برضه المفروض اللي يشرف عليه ولاد الشيخ سلفي وباقي عيال الست محروسة

.

مهو الكلام ده يابية بس بشكل مؤقت بس بعد كده ولاد الحاج عسكر هيبقوا هما المسئولين عن نفسهم يعني محدش مسئول عنهم وكمان هيغيروا القانون اللي بيحكم حياتهم بحيث إيه ان كبيرهم يكون منهم وملوش دعوة بقانون البت مدنية  ويفضل حلف ولاد الحاج عسكر كده مع نفسه وملوش دعوة بحد يعني من الاخر كده يعمل عيلة جوة العيلة هتقولي يعني هي تعقل كده ان كبير حلف ولاد الحاج عسكر يقبل علي نفسه واحد من عيال الشيخ سلفي وباقي اهل البت مدنية هو اللي يتحكم فيه ويقولوه روح وتعالي احنا هنهزر , وطبعا لو حصلت مشكلة ولا خناقة من بتاعت ستات البيوت ديه يروح ولاد الحاج عسكر عاملين يبعتوا واد من بتوع اليومين دول يعاكس البت مدنية وهي خارجة من المدرسة ويصورها ويروحوا لاهل امها محروسة ويقولولهم ادي تربيتكم ويمشوا الشيخ سلفي ويحله مجلس العيلة ويجيبوا مجلس عيلة جديدة عشان يضبط البت مدنية وبكده يبقي هو اللي متحكم في حياة البت مدنية والست محروسة واهل الست محروسة

يعني من الاخر كده بص يامعلم اللي هيتم كده  ( حلف ولاد الحاج عسكر هيبقي مستقل محدش يعرف يكلمه , يسيب الامور بتاعت اللبس والاكل والشرب لعيال الشيخ سلفي وباقي اهل البت مدنية لكن الخناقات والذي منه دي بقي مهتمه يعني ايه حد يتعرض لمدنية جواه ولا برا هو اللي يقف له , ويجيبه واحد كده منظر يقولوه انت اللي مسئول عن شكل مدنية قدام الناس يعني لما تيجي تتجوز انت اللي تختار العريس ولما تخلف انت اللي تختار اسم العيال) 

ياتري يامدنية هتسيبي نفسيك لعيال الحاج عسكر ولا هستمعي كلام امك محروسة