الفل قالي الفل قالي ياشاب يابني تعالي أنتخبني,
دي حكايتي مع فل من الفلول اللي نغصو علينا عيشتنا وضيعوا وقتنا وجهدنا معاهم طبعا برعاية مجلس مبارك الأعظم , قابلت الفل قدام لجنة إنتخابية واقف بجح متبجح وكأنه إبن الميدان وعمال يوزع في بروشورات وانا ماشي سمعته ابعت يابني هات البروشروات العدد في الليمون خبط عيني عليه شافني ماسك كاميرا وهاتك ياردح اهلا اهلا ياباشا تعالي اتفضل ودار بيني وبين الفل حوار ,ايوة انا وقفت واتكلمت مع الفل وانا عارف انه فل وكمان اخدت من برشور عايز اعرف الفل عايز ايه من البلد اللي نهكوا عرضها هو وزعيم شلته وبعزه بصفوته بسروره بجماله
الفل : مساء الخير ياباشا انتخبت
انا : لا لسة ليه
الفل : هات يابني هنا بروشور ادي الشباب المودرن
وقف بروح امه بيشرحلي الحزب بتاعه وبرنامجه الانتخابي عشان كده قطعت عليه كلامه
انا : في اي قلق او مشاكل حصلت
الفل : لا لا عادي ياباشا الدنيا جميلة ومفيش اي حاجة والحياة عال العال والإنتخابات اهي زي الفل مش زي ايام التزوير اللهي لا يرجعها ( ايواااااا الفل اللي كان بيزور ويكسب بالتزوير بيدعي اللي علي اللي زورله )
كلام الفل فكرني بالمثل اللي بيقولك ( لما تقتل البرص أقطعله ديله عشان لسة الوساخة فيه ) ما بالك ان ديل البرص لسة حاكم يبقي الديول الصغيرة لسة بتبخ سمها في وشينا , المهم ركز في اللي جاي
الفل : الا انت مين حضرتك
انا : صحفي
الفل : اهلا أهلا يأستاذ من جريدة ايه
انا : لا أنا مش من جريدة انا صحفي مستقل
الفل : ع النت يعني
انا : ايوااااااا علي النت
الفل : هات ياباشا البروشور ده ولااااااااااا هاتلي بروشور كبير ( مش عارف ايه حكاية البروشورات معاه )
رجعت سألت الفل تاني واللي حيرني وخلاني اقول في عقلي بالي ( أهزي يأبن الهزاية ) طريقة كلام الفل لما عرف اني صحفي واتكلم كأنه بيسجل مع البي بي سي
أنا : ايه بقي الدنيا ماشية ازاي من امبارح في تجاوزات ولا حاجة
الفل : بسم الله الرحمن الرحيم ( ده الفل والله مش انا ) مع حضرتك شكري محروس الشهير بشكري موتورز ( مرشح عن حزب مصر الحديثة مودرن إيجيبت ) رمز أبو الهول انا حضرتك قمت بإنشاء مشروع الزيتون الجميلة وانا عايش ما بين مصر وفرنسا وباذن الله عندي مشروع حضاري للنهضة بالدائرة واهالي الدايرة
لاحظ ان الفل قلب لسانه وبقي يتكلم لغة عربية
انا : بالنسبة للتجاوزات في اي تجاوزات حصلت قدام اللجان او جوه اللجان من اي احزاب تانية
الفل : اها طبعا ( من شوية كان بيقول الدنيا جميلة ) طبعا الاخوان والسلفيين خربين الدنيا وبعدين ما احنا كلنا مسلمين مش عارف انا في ايه بيوزعوا ورق قدام اللجان وبينظموا المرور انا مش عارف هما عايزين يودنا علي فين عايزنا نرجع نركب الحناطير تاني لا لا لا الناس دي مفيش عندها الثقافة المودرن
الفل : تأخد سيجارة
أنا : لا مابغيرش
الفل : ألو أيوا ( أيوا يابني ابعتلي بروشورات انا هنا اهو لسة كان معايا لقاء صحفي مع الاستاذ محسن , محسن ايه يا باشا
أنا : عبد الحميد
الفل : مع الاستاذ محسن عبد الحميد ابعتلي يابني البروشورات
الفل خلي كلمتين ع الماشي لقاء صحفي ( ياديني ع الاعلام اللي جنن الخلق ياجدعان )
المهم الفل حس ان البساط أحمدي وولعنا السجاير وبقيت الحياة لذيذة وكملي بقي الخطبية العظمية اللي كانوا بيخبطبها وكأنه واقف تحت القبة
الفل : ياباشا انا ليا صفحة علي الفيس بوك كتبت فيها للعواجيز ( أرحله بقي عن البلاد دي كفاية عليكوا) أنا اصلا من مرشحين الشباب والله وماليك عليا حلفان من يومين نزلتهم في الاميرية لابس بنظلون جينز وكاب وحزازة والله بعت الواد ابني يجبلي حزازة ونزلت قعدت مع الناس علي القهوة ,
الفل شافني واقف بصور راح مجمع عياله علي أساس اني هصورهم وبتاع
الفل : هصتور يأستاذ ( مرددتش عليه ) راح برضه مجمع العيال وقفهم جنب العربية , هتصور يأستاذ
انا : لا ياباشا خلاص كده تمام
الفل : اقف ياض وافتح القميص وبين اللوجو بتاع الحزب وبين صورتي
وارح مصور العيال
سبت الفل ومشيت وشوية ركب عربيته وانتهت صفحته من حياتي شوية وسألت نفسي
( يااااااديني حظاظة وبنطلون جينز ) الله يعلنك ويعلن أيامك يامبارك الله يلعن نوابك اللي كانوا بيتجاروا بالغلابة والي يلعن ايام نائب هيجي ويضحك علي الغلابة تحت اي مسمي
ليست هناك تعليقات:
إرسال تعليق